Ақсу қаласындағы Қаныш Сәтбаев атындағы дарынды балаларға арналған мамандандырылған гимназиямызда айтулы іс-шара өтіп, мұның өзі көпшіліктің шынайы ризашылығы мен қолдауына ие болды. «Ұлылықтың басында ұстаз тұрар» демекші осы мектептің негізін қалап, шаңырағын көтерген алғашқы директоры, ҚР Білім беру ісінің үздігі, Ерен еңбегі үшін, «Еңбек ардагері» медальдарының игері Сламбекова Рымкеш Хамитқызына арналған оқу кабинеті ашылып, есімі ардақталды. Осы өнегелі іс-шарада бірқатар құрметті қонақтар, еңбек ардагерлері, мектеп директорлары, ұстаздар мен оқушылар, Рымкеш Хамитқызының шәкірттері бас қосты. Облыстық білім басқармасы, мектеп және мектепке дейінгі білім бөлімінің басшысы Азанбаева Нұргүл Шалабаевна мен “Аманат” партиясының Ақсу филиалының басшысы Бибигуль Хамидуллаевна, Ақпарат орталығы басшысы Зада Аскарович арнайы келіп құттықтады.
Жаңа кабинеттің лентасын қию құрметі ұлағатты ұстаз Рымкеш Хамитқызы мен облыстық білім басқармасынан келген Нұргүл Шалабаевнаға ұсынылды.
Шараға қатысушы барлық қонақтар, ұстаздар естеліктері мен жүрек жарды игі тілектерін білдірді. Білім басқармасының басшысы атынан гүл шоқтары мен ізгі тілектерді Нұргүл Шалабаевна айтып өтті.