Құрметті гимназия ата-аналары. ҚР БжҒМ 2017 жылғы 27 шілдедегі 355 бұйрығына сәйкес мектепішілік Қамқоршылық кеңес құрылады және оның құрамына әр сыныптан бір ата-анадан сайланады. Ұсыныстар келесі электрондық пошта арқылы қабылданады: gimnaziya-aksu-metodkab@mail.ru. Телефон: 8(71837)6-42-94

Республикамызда жүзеге асып жатқан "Рухани жаңғыру" бағдарламасы аясында "Тарихыңды таңы" жобасын жүзеге асыру мақсатында гимназия ұстаздары мен оқушылары 22 қыркүйек күні Мәшһүр Жүсіп кесенесіне барып, аты елімізге әйгілі ақын, ғұламаның өнегелі өмірі мен шығармашылығы туралы мол білім алып, өнегесіне тамсанып келді.

Салауатты өмір салтын насихаттау бағытында өтетін Денсаулық фестивалі биыл да өз жалғасын тапты. "Жақсы көрсеткіштерге қол жеткізейік" атты денсаулық фестиваліне жиналған оқушылар мен мұғалімдер көңілді флешмобтан кейін асық ату, шахмат, тоғызқұмалақ ойындары, футбол, баскетбол, көңілді сөре жарыстарына қатысты. Оқушыларға күнделікті тамақтанудың тиімді жолдары туралы дәріс оқылып, кітапшалар таратылды.

Білім күніне арналған салтанатты жиын "Рухани жаңғыру" шаралары аясында "Менің табысқа апарар жолым" атты кездесумен жалғасты. Бұл шараның мақсаты: гимназияның табысты түлектерінің жетістікке жету жолымен таныстыру, болашақта мамандық таңдауда бағыт-бағдар нұсқау. Кездесу қонағы гимназия түлегі, Ақсу қаласы Ішкі істер бөлімінің тергеушісі, аға лейтенант Байболат Кәкім. Кездесуге 9-11 сынып оқушылары, мұғалімдер қатысты.

Білім күніне арналған салтанатты саптүзеу 1-ші қыркүйек күні сағат 10.00-де өтеді. Салтанатты саптүзеуден кейін барлық сыныптарда сынып сағаттары өткізіледі.

2018 жылдың 22-25 тамыз аралығында Семей қаласы, Абай ауданы, «Абай және Шәкәрім» музей-кешенінде жалпы білім беру ұйымдарының 5-11 сынып оқушылары арасында ХІХ республикалық Абай оқулары өтті. Облыс құрамында осы додаға қатысқан 10 сынып оқушысы Жомарт Ақтоты көрсеткен белсенділігі мен қол жеткен ерекше жетістігі үшін «Дарын» РҒПО-ның грамотасын иеленді. Ақтоты мен жетекшісі Дария Амантаевнаны құттықтаймыз!

1 тамыз бен 30 қыркүйек аралығында дәстүрлі түрде республика бойынша "МЕКТЕПКЕ ЖОЛ" қайырымдылық акциясы өткізіледі. Мақсаты азқамтылған, көпбалалы, көмекке мұқтаж отбасы балаларын мектепке қажетті оқу құралдары, мектеп формасы т.б. заттармен қамту. Барлық азаматтарды балаларымыздың кедергісіз білім алуына қол ұшын беруге шақырамыз. Байланыс тел: 6-42-94, 5-02-80, 5-16-81.

Үлгілі "Айгөлек" би ансамбілі 29.06.-01.07. аралығында Грузия мемлекетінің Батуми қаласында өткен ІІІ Халықаралық "ГРУЗИЯДАН МАХАББАТПЕН" фестиваль-байқауына қатысып, бірнеше категорияда жүлделі І орынға ие болды. 10 мемлекеттен келген 75 ұжымның арасынан суырылып шығып, Қазақстанның, облысымыздың намысын қорғап, биік шыңнан көрінуі - шығармашыл да, талантты жетекшінің еңбегі. Ол Динара Негматуловна Зембаева.

Мағжан Жұмабаевтың туған ауылы Сарытомарда ақынның 125 жылдығына орай үлкен той өтті. Ақ шаңқай киіз үйлер тігіліп, бəйге, балуандар күресі ұйымдастырылып, Қазақстанның танымал əншілері əн шырқады. Сондай-ақ оқушылар арасында Республикалық "Мағжан оқулары" байқауы өткізілді. Гимназиямыздың 7 сынып оқушысы Мұрат Нұрдəулет "Өлең- менің Шолпаным, Күнім" бағыты бойынша ІІІ дәрежелі дипломмен және бағалы сыйлықпен марапатталды. Құттықтаймыз!

1 маусым Балаларды қорғау күні гимназияда сауықтыру лагері ашылып, қалалық жағажайда балалар үшін мереке ұйымдастырылды. Барлық балалар танымдық, спорттық шараларға белсене қатысып, сыйлықтармен мараратталды.

"Мен өмірді таңдаймын" атты облыстық акция шеңберінде гимназияда "Отбасындағы баламен болатын кикілжің жəне оны шешу жолдары" атты семинар-практикум өтті. Гимназия психологы Назигүл Шаймарданова конфликтінің жағымды жəне жағымсыз жақтары, оны шешу жолдары, жасөсіпірімнің эмоционалдық, физиологиялық жағдайына əсер етуші факторлар, олардың ең негізгі қажеттіліктері туралы түсіндіріп өтті.

18 мамыр гимназияда жыл сайын дәстүрлі түрде "Дарындыға-дархан жол 2018" шығармашылық кеші өтті. Кеш барысында гимназияның абыройын түрлі олимпиадалар, ғылыми жоба, сайыс, спорттық жарыстар мен пікірсайыстарда, интернет олимпиадалар мен оқуларда асқақтатып жүрген оқушылар марапатталды. Ал "Жыл оқушысы" атағына Республикалық пән олимпиадасының қола жүлдегері, 11 сынып оқушысы Боранбай Бихан ие болды.